كائن زينا

يوم من الايام نزلت الشارع العب مع عيال الحتة بتاعتنا واحنا بنجري وسط الشارع وبنلعب ومنسجمين لقيت قطة صغيرة تعيسة كل حلمها هو انها تلاقى والدتها وانها تاكل كانت بتنونو وتتجه نحو رجلي وبتلمس رجلي أصريت انى اخدها مع ان كل عيال الحتة قالولى لا سبها هتجبلك الامراض قلتلهم مدام بعمل الخير مش هيهمنى امراض ، رحت البيت بيها وحطيتها جنب باب البيت  وعملتلها بيت خشب صغير علشان يحميها من البرد ودخلت البيت ولم اخبر اي شخص من اللي فى البيت انى جبت قطة ودخلت الحمام استحميت وبعد كده دخلت لوالدي قلتله عاوز 3 جنيه انزل اشترى حاجة حلوة مع صحابي قالي خد 2 جنيه بس قلتله وماله هات حد لاقى نزلت رحت لمحل البان اشتريت بجنيه لبن وبجنيه لانشون وجبتهم واخدت جنب بعيد اوووى وأكلت القطة الجعانة اللى وهى بتاكل نظرت ليا نظرة كأنها بتقولى مش هنسالك الجميل ده ابداً بعد ما اكلتها فضلت تلمس رجلى وبعده قلتلها تصبحى على خير ودخلت البيت وحسيت انها بترد عليا وبتقولى وانت من اهله يا صاحبى ، تانى يوم صحيت من النوم اول حاجة عملتها جريت على بابا اخدت منه 5 جنيه نزلت اشتريت اكل كتير للقطة رجعت جرى واكلتها وفضلت العب انا وهى لغاية بليل محستشى انى محتاج لمترجم يترجملى هى عاوزة ايه وهل هى عاوزة تاكل و تشرب ولا لا ؟؟ كنت بفهمها بمجرد ما بنظر إليها حبيتها جداً ونمت نوم عميق ولما صحيت فكرت انى لازم ارجعها لمكانها تانى يمكن تلاقى والدتها بالفعل رجعتها ولقيت والدتها هناك حطيتها فى الارض وجريت على مامتها ولقاء منتظر الام والبنت كانت لحظة من اجمل لحظات حياتى اعتقد ان حضن الام بدون طعام افضل بكثر من عدم وجودها مع وجود جميع الاطعمة اللى فى العالم مشيت ورجعت نظرت إليها فلم أراها فأكيد ذهبت إلى والدتها ثم عدت إلى المنزل ثم بعد اكثر من ساعتين نزلت احضر العشاء من سوبر ماركت عم حمادة لاقيتها هى ومامتها على الباب كأنها بتشكرنى رحت وجبتلهم اكل واكلتهم وكنت مبسوط اووى هى ديه قصة القطة الرقيقة والام الوفية مغزى هذه القصة التى لا اعتبرها تشد اى شخص من الذى سيقرآه ولكنى أرى ان القطة هو كائن حساس ورقيق واعتبره مثلى ومثلك له شعور يغضب ويضحك ويحزن ويبكى ويبتسم كل الذى اريد ان أسالكم أياه لماذا لا تستحق القطة بعض من الحنان ؟؟ ولماذا تعرف القطة بأنها غدارة ؟ مع انها اجمل وارق كائن عرفته واكتر وفاء من حيوانات اخرى كثيرة فهل تجبونى على بعض من هذه الاسئلة ؟؟  ثم اخيراً اعلم انى اكتب باللغة العامية فهذا ما افهمه واعتقد هذا ايضاً ما تفهموه انتم اعتقد انى امتلك قصص كثيرة ستودون ان تقرأوها واعتقد ايضاً ان هذه اصغر قصصى والذى لا اعتبرها قصة ولكن اعتقد انكم هتعرفوا ايه هدفى منها .